Un añu d'efemérides

La confluencia d'un marcu natural incomparable y unos episodios históricos de gran relevancia espliquen que Cuadonga seya un puntu d'una importancia especial na identidá asturiana y española. A eso xúntase una devoción y el desenvolvimientu d'una pelegrinación que convierten esti enclave nun sitiu onde la espiritualidá —más allá de les creyencies de caún— pue esperimentarse en conexón dafechu col pasáu y la naturaleza.

La so meyor espresión ye una cueva natural, escenariu de la Historia onde se venera una imaxe de la Virxe a la que la sociedá asturiana va cien años coronó nos sos corazones. Por eso esti añu 2018, na conmemoración de la triple efeméride, celébrase un Añu Xubilar Marianu que dexa ganar el xubiléu y llograr indulxencia plenaria a los pelegrinos.

Virxe de Cuadonga

Cien años d'una coronación

En 1918 la Virxe de Cuadonga coronóse nel Real Sitiu

Íntima ye la vinculación ente Cuadonga y la devoción mariana, porque anque pudiere tratarse de la cristianización d'un anterior cultu paganu al agua o a divinidaes naturales, la verdá ye que dende la dómina medieval el llugar ye a les clares un sitiu de devoción a la Virxe María.

Lleer más

Un cultu milenariu

Ye poco conocíu'l nacimientu y medría de la devoción mariana de Cuadonga nos primeros sieglos medievales, anque ye mui probable que la tradición de la intervención milagrosa de la Virxe nel combate pelaxanu desembocare nuna primera veneración a esta "Virxe de les Batalles". Nel sieglu XII apaecen los primeros testimonios qu'acreíten la existencia d'un sitiu de cultu en Cuadonga, qu'aína va recibir l'apoyu de los reis castellanos y, dende la Modernidá, de la propia Monarquía Hispánica, interesada en potenciar el so finxu fundacional nesti llugar de la xeografía asturiana. Ensin dulda esti apoyu va redundar nun espardimientu de la devoción y nel aumentu de les pelegrinaciones, los votos y les promeses, que nun aparó a lo llargo de la Historia.

1918, un añu escepcional

El 8 de septiembre de 1918 el Santuariu vivió un socedíu escepcional. Pola mor del XII Centenariu de la Batalla de Cuadonga, la imaxe de la Santina col Neñu coronóse canónicamente. Trátase d'un ritu llitúrxicu que señala la noción de la Virxe María como Reina de la Ilesia. Una gracia que l'obispu d'Uviéu pidiere pa la ocasión al Papa y que garró forma esi día en Cuadonga cuntando cola presencia de los reis Alfonso XIII y Victoria Eugenia de Battemberg, amás del cardenal Victoriano Guisasola Menéndez, dellos obispos y milenta fieles y devotos.

Cuando la Virxe tuvo en París

Cuando la Guerra Civil, clausuróse'l Santuariu, retiráronse los elementos de cultu y destinóse a hospital. A instancies d'Indalecio Prieto, el Comité Provincial del Frente Popular encargó-y a Faustino Goico-Aguirre, delegáu provincial de Belles Artes, que recoyere la imaxe de la Virxe de Cuadonga, que guardaren con procuru unes monxes y enfermeres que trabayaben n'hospital habilitáu en santuariu, y treslladóla a Xixón, al Atenéu Obreru. En setiembre de 1937 la imaxe treslladóse a la embaxada española en París, xunto a otres obres artístiques. A últimos de marzu de 1939, a puntu d'acabar la guerra, súpose la noticia de la presencia de la Virxe na embaxada. El gobiernu nacional nuevu y l'obispáu uviedín entamaron la so vuelta al Santuariu, onde diba llegar en xunetu.

Historia d'un himnu centenariu

El centenariu de 1918 y la coronación canónica de la Virxe foron el momentu la cuenta pa que se compunxere un himnu que valiere de seña d'identidá musical al Santuariu y a la devoción mariana, amás d'alcordanza de los fechos históricos de Cuadonga, con un valor incuestionable p'Asturies y pa toa España. Foi una iniciativa entamada por don Fermín Canella, rector de la Universidá d'Uviéu y cronista d'Asturies, pola que se convocó un concursu de composición, y escoyóse la obra de Sagastizábal, con lletra de Restituto del Valle. Asina, en setiembre de 1918 sonó pela primer vez en Santuariu el "Bendita la Reina de nuestras montañas, que tiene por trono la cuna de España", que tantes veces hasta güei pudo oyese.

La Cueva de Cuadonga

"Cova Dominica", la Cueva de la Señora

Una cueva con muncha historia

Esta etimoloxía testimonia a les clares la importancia que'l cultu marianu tien nesti enclave. Delles lleendes falen d'un eremitoriu rupestre na dómina de Pelayo o una fundación por Alfonso I, pero la verdá ye que namás se documenta una comunidá monástica en Cuadonga dende primeros del sieglu XII.

De toles maneres, tamos delantre d'una devoción milenaria nun escenariu d'una naturaleza exhuberante onde lo imponente de los picos, la frondosidá del monte, la fuercia del agua y en definitiva la grandiosidá del paisaxe igüen un conxuntu d'una guapura infinita y afayadizu pal cultu espiritual.

El templu colgante, el "Milagru de Cuadonga"
Vista panorámica de la Cueva de Cuadonga

El primer templu del que se tien constancia en Cuadonga taba asitiáu na mesma cueva, ganándo-y espaciu al aire. Tratábase d'una estructura pequeña de madera —a nun ser una capiya pétrea que guardaba la imaxe— que, saliendo, quedaba encaxada na cueva y sofitada nuna viguería volada que paecía colingar del monte. Yera'l llamáu "Milagru de Cuadonga", porque se pensaba que lu construyeren ánxeles pa la gloria de la Virxe. A él entrábase pela Escalera de les promeses, que tovía existe, que xubía a la cueva, en paralelo a la colexata vieya.

La quema de 1777
Grabáu de la Cueva enantes de 1777

Esti complexu constituyía'l Santuariu de Cuadonga que visitaron eruditos ilustres y nos describieron, y ye'l que garró baxo la so protección directa la Corona española decididamente dende Felipe II. Sicasí, el 17 d'ochobre de 1777 una quema casual —quiciabes producida poles llámpares de la capiya— dexó'l templu fechu povisa, perdiéndose xoyes, esvotos, ornamentos y la propia imaxe de la Virxe. La construcción en madera y el so allugamientu tan arispiu fixeron imposible apagar el fueu, y esi día perdióse dafechu un patrimoniu del que se sacaron los restos nel ríu díes depués.

El proyectu fallíu de Ventura Rodríguez
Xilografía de la Colexata en 1860

Tres de la quema, los callóndrigos acudieron a la Corona pa sacar fondos que fixeren posible la reconstrucción. La Cámara de Castiella encargó a un arquitectu de sonadía como Ventura Rodríguez, de l'Academia de Belles Artes de San Fernando, diseñar el templu nuevu. Propunxo en 1780 una basílica neoclásica maxestosa de dos plantes enriba del estanque énte la cueva. El protagonismu teníalu la monarquía, centrando'l templu nel mausoléu de Pelayo y calteniendo la Santina na cueva, visible tres d'un ventanal. Anque desembolsáu un primer presupuestu, la oposición de los callóndrigos al diseñu, fixo que namás se pudiere construyir y canalizar l'estanque debaxo la cueva y en 1796 paralizáronse definitivamente les obres.

Un sieglu XIX baxo l'influxu de Roberto Frassinelli
Camarín de Frassinelli en 1906

La visita al Santuariu de los Duques de Montpensier en 1857, y sobre manera la del añu siguiente de la reina Sabel II, supunxo un impulsu de reactivación de les obres en Cuadonga. A la propia Reina presentó-y Nicolás Cástor de Caunedo un proyectu de templu historicista como monumentu nuevu a la monarquía pelaxana. Pero esti proyectu tampoco nun aportó a facese, igual qu'otros intentos pola Comisión Provincial de Monumentos. Va haber qu'aguardar al episcopáu de Sanz y Forés y el so encargu a Roberto Frassinelli pa ver una remodelación de la cueva en 1875: la disposición d'un camarín de madera tallao con una decoración abondosa inspirada nel arte prerrománicu asturianu, onde se punxo la Virxe dexando diáfanu'l restu de la cueva.

La Cueva de Cuadonga na actualidá
La Cueva de Cuadonga

Acabada la Guerra Civil, los estrozos provocaos na cueva fixeron posible esmantelar el camarín y construyir la rodiada que güei ye visible ellí. Esa misión encargóse al arquitectu Luis Menéndez Pidal, que buscó dar protagonismu al ambiente de la cueva y el so paisaxe xunto a la propia imaxe, construyendo pa eso una capiyina o sacristía siguiendo patrones del prerrománicu asturianu y buscando una ornamentación sobria que convirtiere la propia cueva nun verdaderu templu natural.

Basílica de Cuadonga
Cripta de Frassinelli
Interior de la Basílica de Covadonga
Cripta de Frassinelli

La Basílica de Cuadonga

El día de consagración del Camarín de la cueva en 1874, l'obispu d'Uviéu, Benito Sanz y Forés, anunció a los fieles el so determín de dotar al Santuariu d'un templu monumental. Anque tovía diba tardar un par d'años pa poder executalo, decidióse llevantar esta "catedral de Cuadonga" —como se llamó munchos años— n'El Cuetu, una elevación pequeña nel mediu del valle y delantre d'El monte Auseva, qu'ufierta una perspectiva espectacular de La Cueva de Cuadonga y la so rodiada natural.

Volvió ser Frassinelli l'escoyíu pa facer el diseñu de la construcción, siguiendo col revival medieval qu'empezare col camarín, anque escoyendo d'esta vuelta l'estilu neorrománicu. El proyectu de Frassinelli nun s'executó como taba concebíu y el responsable final de la obra foi l'arquitectu Federico Aparici y Soriano. Asina, en 1877 empezaron les obres col desmonte d'El Cuetu, siendo'l rei Alfonso XII l'encargáu de disparar el primeru de los barrenos.

Lleer más
Rodiada de la Basílica de Cuadonga
Hotel Pelayo
Hostal Favila

Un espaciu ritual y de pelegrinación

Cuadonga ye un referente universal d'espiritualidá

Cuadonga ye muncho más que la Santa Cueva y la Basílica. Ta claro que'l complexu del Santuariu complétase con otres construcciones como los yá mentaos Hotel Pelayo y Hostal Favila, amás d'otros. Pero, ensin dulda, Cuadonga ye en bona midida les persones qu'ellí tán, les que viven y atienden el Santuariu o los pelegrinos y visitantes que hasta ellí s'averen. Son el paisaxe humanu de Cuadonga, tan ricu y fundamental como l'espiritual y el natural almirables nel Real Sitiu y la so rodiada.

Ilesia de la Colexata de San Fernando
Claustru de la Colexata de San Fernando
Sepulcros románicos

La Colexata de San Fernando ye l'edificiu más vieyu del Santuariu, anque nun pervive na so forma primera. A los pies de la cueva, a nivel del últimu tramu de la Escalera de les Promeses, existió un primer edificiu monásticu con claustru que valía como residencia al abá y los callóndrigos que dende polo menos el sieglu XII s'encargaben del cultu nel templu colgante. Yera un edificiu mui modestu con una antigüedá qu'atestigüen los sepulcros románicos que se caltienen nel propiu claustru de la Colexata.

El pasu del tiempu fixo qu'aquel primer edificiu fore estropiándose y quedando inhabitable. Foi'l patronatu real ente los sieglos XVI y XVII el que dotó a la comunidá relixosa d'un monesteriu nuevu. Y, asina, d'esti emburrión deriva l'edificiu que ye güei visible nun espaciu aparentemente ganáu al monte: una estructura rectangular de dos pisos alredor d'un patiu y claustru interior, con una torre nún de los estremos y la capiya nel llau apegáu a la cueva.

Tres de la Guerra Civil, llevántase xunto a la Colexata un edificiu ximielgu que va ser la Casa de Novenes y n'espaciu ente medies álzase una fonte ornamental inspirada na dómina de Carlos III.

Escolanía de Cuadonga

Dende siempre la música foi una de les señes d'identidá del cultu en Cuadonga. Dende'l sieglu pasáu la música nel Real Sitiu tien una personificación na Escolanía. Trátase d'un coru de voces blanquees qu'ayuda a la lliturxa y la veneración a la Santina, dotando a les celebraciones d'una solemnidá particular.

El grupu de neños cantores ente 8 y 18 años que formen esta Escolanía vive en Santuariu a lo llargo del cursu escolar, porque na so actividá compaxinen la formación académica con una gran preparación musical y coral baxo la dirección de músicos reconocíos.

Nestes décades, munchos escolanos antiguos fixeron de la música la so actividá profesional —directores d'orquesta, coros, profesores de conservatoriu y instrumentistes— y dalgunos d'ellos como profesores de les siguientes xeneraciones de la Escolanía.

Órdenes relixoses femenines

Anque la so presencia pue pasar munches veces desapercibida, el Santuariu de Cuadonga debe muncho del so ser a les monxes que formen parte de la comunidá permanente alredor de la Santina. Na actualidá son dos les comunidaes femenines que conviven en Cuadonga. Les que llegaron más recién son les Fíes de Santa María del Corazón de Xesús, una congregación que dende últimos del 2014 atiende los pelegrinos que lleguen a la Casa Diocesana d'Espiritualidá allugada énte la Colexata de San Fernando. Esi añu relevaben a les Esclaves del Corazón Inmaculáu de María, que desempeñaren esi llabor dende 1968.

Per otru llau, les Hermanes Carmelites Mensaxeres del Espíritu Santu, una comunidá fundada en Brasil en 1984, tán al cargu de los neños de la Escolanía.

Finalmente, ha señalase la presencia de les laiques consagraes pertenecientes a la Institución Teresiana que viven en Cuadonga y que s'ocupen tolos díes de l'atención y caltenimientu de la ropa de la Santina y la lliturxa.

El papa Xuan Pablo II

Foron munchos los pelegrinos qu'a lo llargo de la historia visitaron Cuadonga. Los más d'ellos son caminantes anónimos que llegaron hasta ellí, pero otros dexáronnos el so nome y inclusive'l rellatu de la so travesía. Ente toos, pue destacase una partida de nomes propios como'l de la reina Sabel II, qu'en 1858 foi al Santuariu en compañía de los sos fíos Alfonso y M.ª Sabel, que recibieron na cueva la confirmación pol capellán real, San Antonio María Claret, fundador de los Claretianos.

Anque non en pelegrinación, sinón viviendo en Cuadonga como callóndrigu, Pedro Poveda dedicóse en Santuariu al estudiu de les cuestiones pedagóxiques a primeros del sieglu XX, y nesti llugar diba ver la lluz el so proyectu de fundar la Institución Teresiana. Décades más tarde, en 1954, pelegrinó hasta Cuadonga'l cardenal Angelo Roncalli, futuru papa Xuan XXIII. Almirando la guapura del paisaxe, l'entós patriarca de Venecia calificó Cuadonga como una "sonrisa de la naturaleza". Tamién rezaron énte la Santina san José María Escrivá de Balaguer, san Manuel González, la mierense Práxedes Fernández, y el papa Xuan Pablo II, que la visitó en 1989.

Les Rutes de Pelegrinación

Los caminos a Cuadonga

Munches persones a lo llargo de la historia empobinaron ellí los pasos pa vivir la so devoción énte la Virxe en Cuadonga o namás pa disfrutar de la espiritualidá y naturaleza qu'ellí se puen esperimentar. L'andadura d'estos viaxeros, los más d'ellos anónimos, marcó enriba del mapa rutes y caminos que lleven dende dellos sitios al Santuariu y Los Picos d'Europa.

Lleer más
Ruta de les Pelegrinaciones (Uviéu-Cuadonga)

Ruta de les Pelegrinaciones

Uviéu - Cuadonga.
Travesía Andariega (Xixón-Cuadonga)

Travesía Andariega

Xixón - Cuadonga.
La ruta de la Reconquista (Sotres-Cuadonga)

La ruta de la Reconquista

Sotres - Cuadonga.
Camín del Oriente (Llanes-Cuadonga)

Camín del Oriente

Llanes - Covadonga.

Un sentimientu llamáu Cuadonga

El de Cuadonga ye un universu singular nel sentíu más ampliu del términu. Un mundu d'histories llamatives y emociones ensin llímite que toquen el corazón del visitante, y munches d'estes histories tienen como protagonista a la Virxe. Una visita a Cuadonga pon al algame del viaxeru un refileru de posibilidaes pa realizar una inmersión vital ensin precedentes nun sitiu únicu, que ta más allá de xeografíes y mapes, y qu'a menudo conviértese nun sentimientu noble y enraigonáu.

Novena a Cuadonga

La Virxe de Cuadonga priende dende tiempu inmemorial una devoción apasionada y apasionante que tien espresiones diverses como les promeses –mui visibles na famosa Escalera de les promeses que xube hasta La Cueva de Cuadonga–, o la Novena –un periodu de nueve díes de lliturxa, rezos y procesión que culminen cada añu'l día 8 de setiembre, Festividá de la Virxe de Cuadonga y Día d'Asturies–, y qu'axunta milenta fieles y visitantes.

Precisamente, pola pasión devota qu'espierta la Santina ye frecuente alcontrar per toa Asturies imáxenes d'ella n'ilesies, capiyes, amás de n'otros espacios cívicos y inclusive nes cases. Y más allá d'Asturies, la Virxe de Cuadonga siempre foi un símbolu clave na identidá asturiana.

Esta emoción identitaria llamada Cuadonga prendió con fuercia en toles comunidaes asturianes fuera del Principáu, y de manera mui visible nos Centros Asturianos del mundu enteru: n'España, n'otros países europeos, n'América, Asia, Australia, etc.

En definitiva, Cuadonga ye una espresión simbólica y espiritual d'asturianidá.

La Virxe de Cuadonga y los sos mantos

La Santina, "pequeñina y galana" como se diz popularmente d'ella con ciñu, ta vistida con un mantu, y asina la ven davezu los pelegrinos y visitantes. La Virxe de Cuadonga tien más de mediu centenar de mantos, donaos por delles personalidaes y instituciones a lo llargo d'estos sieglos —el más vieyu que se caltién enteru ye'l donáu por Sabel II—. Cambiaos a menudo, ufierten al pelegrín una imaxe de la Virxe y el Neñu de gran variedá cromática y estilística.

Enriba la cabeza, una corona dorada con perlles nes aristes y brillantes incrustaos con una palomba representando al Espíritu Santu, obra del sacerdote y orfebre l.lenizu Félix Granda Buylla. Y enriba del Neñu, otra coronina, ésta imperial, con cruces y flores de lis en piedres precioses. Son les corones ufiertaes polos asturianos devotos en 1918. Y completa la imaxe la rosa d'oru na so mano, ufierta de la Institución Teresiana, que sustituye la palma o bastón de mandu que pudiere tener enantes, viendo les estampes que se caltienen.

Fonte de los siete caños y El Pozón

El silenciu que reina na cueva vese interrumpíu pol espectáculu natural que se desenvuelve debaxo d'ella: el saltu d'agua o Chorrón d'El Ríu les Mestes que surde de la piedra desembocando sonoramente n'estanque conocíu popularmente como El Pozón, que la so canalización ye lo único que se llevó a cabu del proyectu de Ventura Rodríguez. Ye frecuente que los pelegrinos y visitantes faigan una ufierta en forma de monedes a la Santina, tirándoles a El Pozón.

Debaxo la cueva, na oriella esquierda d'esti estanque, ta la fonte de Los Siete Caños o del Matrimoniu, porque, como rexistra la tradición asturiana "La Virxe de Cuadonga tien una fonte mui clara. La neña que d'ella beba, dientro del añu se casa".

La Campanona

Cuadonga ye un sitiu d'histories prodixoses, y una d'estes histories ye la de La Campanona, que ta cerca de La Cueva de Cuadonga, nun sitiu altu y tranquilu, con unes vistes bárbares sobre la esplanada de la Basílica.

La Campanona, como la conocen popularmente, mide tres metros d'altor y pesa cinco mil quilos, y guarda una historia bien romántica: fundióse en La Felguera (Llangréu) a últimos del sieglu XIX, pola Compañía Asturiana de Metalúrgica, propiedá del inxenieru austriacu Arnaldo de Sizzo, Conde de Sizzo-Noris. Llevada a la Esposición Universal de París en 1900, ellí recibió'l primer premiu na so categoría. Y de la que pasaron los años –allá pela década de los 50 del sieglu XX– la campana donóse al Santuariu de Cuadonga.

La Campanona ye una verdadera obra d'arte. Los baxo-relieves esculpíos pol italianu Francesco Saverio Sortini sobre'l fierro son bramente espectaculares, sorprendentes, tou un universu d'histories clásiques, tanto cristianes como paganes.

Una actividá cultural incesante en Cuadonga nel Añu Xubilar

22018 ye un añu escepcional na historia y na vida cotidiana del Real Sitiu de Cuadonga. Pola mor del Centenariu de la Coronación de la Virxe de Cuadonga y el Neñu Xesús, y la celebración del Añu Xubilar Marianu, Cuadonga tien una actividá pastoral intensa y incesante.

Santuariu de Cuadonga

Santuariu de Cuadonga

Tola actividá cultural y espiritual del Santuariu de Cuadonga pola mor del Centenariu de la Coronación de la Virxe y l'Añu Xubilar Marianu.

Añu Xubilar Marianu

Añu Xubilar Marianu – Cuadonga 2018

Too aquello que precises saber pa vivir l'Añu Xubilar Marianu que se ta celebrando en Cuadonga ente'l 8 de setiembre del 2017 y el 8 de setiembre del 2018.

Separador
  • Conceyu de Cangues d'OnísConceyu de Cangues d'Onís
  • Gobiernu del Principáu d'AsturiesGobiernu del Principáu d'Asturies
  • Asturies Paraísu NaturalAsturies Paraísu Natural
  • Añu Xubilar MarianuAñu Xubilar Marianu
  • Parque Nacional de Los Picos d'EuropaParque Nacional de Los Picos d'Europa
  • LiberbankLiberbank
  • Fundación EDPFundación EDP